~ Carrie Chan's Blog ~: 隱藏於工廈的美味餐廳

小朋友每個星期都係觀塘返學, 放學後大家都要搵地方醫醫肚皮. 網上SEARCH到係附近工廠大廈隱藏了不同美食, 今次就搵間坐得比較舒服的魔膳工房 Mage Kitchen試試.

位置就係APM隔離, 由APM行入鱷魚恤中心, 落自動電梯轉右就到達, 有客貨電梯直到餐廳, 推住BB車都無難度!

Mage Kitchen地方好大, 每張檯之間都留有空位, 我架大型BB車都放得入.

星期六人流較少, 入到門口已有店員帶位, 細心安排BB車位置.

2:00PM黎到, 仍然有LUNCH MENU, 3個大人點了3個LUNCH SET

- 法式紅油燴牛肋條 (跟飯)

- 德國豬手拼腸, 配蒜蓉汁跟意粉

- 慢燒西冷配薯菜跟黑椒汁

每個LUNCH SET都包括紅/白湯, 每日的餐湯都不同, 今次有南瓜忌簾湯及雜菜湯. 南瓜忌簾湯的南瓜味較輕, 雜菜湯的蔬菜量亦唔多.

餐湯亦會送上麵包及果JAM的.

法式紅油燴牛肋條 (下圖), 牛肋條真係炆得好淋, 好入味, 而且好多汁, 送飯真係一流! 配菜有少量豆角及蕃茄, 剛好1個大男人的食量.

德國豬手拼腸 (上圖), 豬手不會太咸, 咸香味剛剛好, 豬手是炆的, 所以肉質都好淋, 上碟只有肉連皮, 沒有帶骨的.

慢燒西冷配薯菜是最好味的, 2片薄薄的西冷, 約6-7MM厚, 燒至7-8成熟, 中間保留了肉汁及肉的鮮味, 完全唔會有肉根! 薯蓉有淡淡的牛油香味, 十分軟滑, 連小朋友都好鍾意食!

LUNCH SET有包埋飲品, 我們點了Latte, Cappuccino & Lemon Water. Latte及 Cappuccino的賣相吸引, 唔係馬虎喎!

最後原來Mage Kitchen有自家製甜品, 有駐場甜餅師傅的, 有多款甜品可以揀. $28/件. 我們點了Lemon Puff及Chocolate Mousse作完結.