早已經立春, 但天氣仍然寒冷, 羽絨褸仍然未能收起, 又傳出3月會再有寒潮, 食晚飯都係打邊爐, 一班朋友一齊暖暖身.
再次黎到佐敦搵食, 見到門面係極為新鮮的海鮮,
水質清澈, 海鮮生猛, 店舖細細, 見環境幾乾淨, 決定入內一試.
一睇MENU, 食物選擇及種類極多, 少有的火鍋配料都有齊, 仲有多款養生貴價鍋底選擇, 我們決定點2個鍋, 大飽口福.
我們一坐下, 店員已奉上熱茶, 茶香而且無苦澀味, 細問之下, 原來名叫”六安骨茶”, 六安骨是茶葉梗, 我係網上見到原來好少茶樓會用的!
友人未到齊, 先點了小食及飲品 – 中華爽口魚皮, 潮式獅奄 及
紫貝天葵.
中華爽口魚皮係有薑蔥個種, 魚皮超爽口, 麻油香!
潮式獅奄粒粒肥美, 完全無沙又鮮味, 而且份量都幾多, 抵食!
紫貝天葵帶一點點山楂味道, 酸酸地好開胃, 配火鍋係最佳配搭.
店員介紹今日的有新鮮送到的生猛深海赤立魚, 可以做刺身, 魚肉用黎打邊爐, 赤立魚一條超過1尺長, 來自南中國海! 勁生猛, 係甘爭扎, 刺身肉質清淡有咬口, 還附送了少量八瓜魚刺身, 同樣新鮮, 上檯還有乾冰製造煙霧效果, 睇得又食得!
2個湯底點了 火焰醉蟹花蛤湯底 及 浩翰魚翅雞鍋.
火焰醉蟹花蛤湯底材料十足, 花蟹, 大隻花蛤, 蕃茄等等, 即時煮滾, 我們第1時間飲”頭啖湯”, 十分鮮味, 用上海鮮做湯底, 油份較少, 比較健康!
浩翰魚翅雞鍋用了冬瓜圈盛起半隻黃油雞, 魚翅群邊及3粒大瑤柱, 湯底微咸, 應該是用了鹽焗雞, 滾起後大家都快速食曬魚翅,
雞件仍然好滑.
手切本地肥牛, 手切本地新鮮牛展, 鮮脆鯇骨腩片, 花彫醉蝦
手切本地肥牛超新鮮, 每片厚度岩岩好, 滾4秒可以即食, 無根而且牛味十足!
新鮮牛展筋紋靚, 較為薄身, 滾3秒夠了, 太耐會縮水, 多食幾片都唔怕.
鮮脆鯇骨腩片有2種口感, 脆鯇片 + 骨腩, 我最愛骨腩因為油脂較多, 好鍾意佢油甘香味!
花彫醉蝦用了花彫和杞子浸住, 用作火鍋後花彫味就沒有了, 不過蝦肉十分彈牙, 真係超新鮮!
頂級桂花蚌, 花膠筒, 牛黃喉, 德哥四式滑
桂花蚌又大件又彈牙, 非常JUICY!
花膠筒有成8-9CM長, 比較薄肉, 女士必食.
牛黃喉, 即係牛的喉嚨, 一般火鍋店少見, 牛黃喉有點似有咬口的雞脾菇.
德哥四式滑係必食推介, 有齊墨魚滑, 牛肉滑, 鯪魚滑及蝦滑, 每款都幼滑無根, 牛肉滑有牛肉鮮味, 絕不花假!
炸嚮鈴, 牛肉刺身
炸嚮鈴是配甜酸汁上檯的, 嚮鈴係即點即炸, 由內到外都好香脆, 就甘點甜酸汁食比用作火鍋更好! 我一口氣食左3件!!
於火鍋店食牛肉刺身真係第一次, 配酸汁及紫洋蔥食用, 都幾野味喎.
鵝肝墨魚丸, 芝士蝦丸, 韮菜餃, 有營三寶
鵝肝墨魚丸係必食, 帶點肉粒的墨魚丸, 裡面包住一小粒鵝肝, 十分甘香, 鵝肝流出少少油, 鵝肝味滿佈整個口腔, 久久不散!
安格斯牛柳粒, 油麥菜, 田園蔬菜拼盤
安格斯牛柳粒帶少少牛根, 仍十分好食, 唔會太韌, 可以跟手切肥肉比下去!
油麥菜 及 田園蔬菜拼盤 賣相好靚, 菜切得整齊又洗得乾淨.
整體真係好好食, 所有食物睇得, 食得, 仲有驚喜! 唔駛舉手, 店員會自動幫我地加湯, 控制火喉, 換碟! 我已經PLAN緊帶埋屋企人再黎食啦!
德哥火鍋專門店 Tak Gor Hot Pot Expert
地址: 佐敦廟街286-298號華志大廈地下A舖
電話: 2362 9338
Facebook: https://www.facebook.com/Takgorhotpot
免責聲明:
產品由 德哥火鍋專門店 提供, 本文章所發表的全部內容均屬個人意見，並不代表該品牌之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛，本人概不負責。
Carrie's Blogspot: http://littlecarriechan.blogspot.com/
Carrie’s Facebook Fans Page: https://www.facebook.com/carrieweblog
沒有留言:
張貼留言