有番甘上下年紀的西餐廳 – 油麻地 紅粉佳人 Pink Salmon Cafe & Restaurant

以我所知, 油麻地紅粉佳人已經有多年歷史, 係我仲係學生妹的年代已經開業至今 (以我所知, 起碼係2004年開到依家), 今晚我就連同幾個朋友一齊去懷舊一下.

店內環境暗暗地, 裝修都唔算舊, 幾有氣氛既, 如果2人檯仲會有candle night添, 情侶黎談心都唔錯.

店名都叫Salmon, 主打梗係三文魚啦, 我地都點左個 ”泡沬三文魚忌廉湯”及 “酥皮焗海鮮湯”

”泡沬三文魚忌廉湯”內有粒粒三文魚粒, 表面的泡沬有點似Latte, 都幾特別.

“酥皮焗海鮮湯”內面有多種海鮮, 跟餐要另$20都抵食.

跟湯會另外附上法包, 法包已經焗得暖暖地, 除左牛油, 仲有2小碟三文魚及飛魚子醬, 好特別!

Set dinner我地點左幾個主菜, 分別有 ”蜜糖香草烤德國咸豬手”, “特級牛柳伴香煎鵝肝” 及 “香草烤海蝦伴香蒜海鮮汁炒扁意粉”

店員會先幫我地上肉食, 食完先再上麵食, 好細心!

”蜜糖香草烤德國咸豬手” – 可以自己親自切開成隻咸豬手, 唔算好大隻, 不過都夠4個人SHARE食, 層皮唔係脆卜卜的那種咸豬手, 不過表面搽上了蜜糖, 咬入口再加埋塊皮好煙UN, 好好味. 我最鍾意食帶有根的部份, 有咬口又唔太咸, 唔錯!

而且伴菜有燒蕃茄、西蘭花、翠肉瓜及茄子, 全部都燒過同幾好味.

“特級牛柳伴香煎鵝肝” – 牛柳點了medium rare, 外層燒得熟左少少. 牛柳可以食到一梳梳的, 有牛味.  香煎鵝肝外脆內juicy, very good!

所有肉食吃完, 店員就會自動送上麵食 - “香草烤海蝦伴香蒜海鮮汁炒扁意粉”

賣相已經好靚, 麵汁比例好, 海蝦真係隻隻彈牙, 扁意粉唔會overcook.

最後我地梗係ORDER埋飲品甜品做完美Ending. Set Dinner本身可以加$28就有酒香軟心焗朱古力蛋糕 (心太軟) 或香焗蘋果脆金寶, 我地2款都有點黎試下.

需時要25分鐘左右, 好在會先上飲品, 一邊傾計一邊等.

心太軟會跟1個雪糕球, 心太軟內的朱古力熟左一D, 無乜流心效果, 味道唔錯!

香焗蘋果脆金寶亦有跟一塊威化及雪糕球, 表面的脆脆配上熱騰騰的蘋果餡, 超好味呀!!! 依家外面好難再搵到Apple Crumble食啦, 呢個甜品係必食!

紅粉佳人 Pink Salmon Cafe & Restaurant

地址: 油麻地彌敦道438號鄧氏大廈地下

Tel : 2388 7208

Openrice: http://www.openrice.com/zh/hongkong/restaurant/%E6%B2%B9%E9%BA%BB%E5%9C%B0-%E7%B4%85%E7%B2%89%E4%BD%B3%E4%BA%BA/10642

免責聲明:

產品由 紅粉佳人 提供, 本文章所發表的全部內容均屬個人意見，並不代表該品牌之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛，本人概不負責。

Carrie's Blogspot: http://littlecarriechan.blogspot.com/

Carrie’s Facebook Fans Page: https://www.facebook.com/carrieweblog

旺中帶靜的小街道, 原來有好野食 - 銅鑼灣 阿麥廚房

離開繁榮的銅鑼灣鬧市, 走到利園後面一帶搵食, 原來加路連山道都有一列食市.

揀左一間燈光較為柔和的西餐廳, 可以食耐D傾耐D.

入到去, 第一張檯就見到電台旅遊節目主持人都係到食緊野~ WOW!

店舖細細, 左邊係一排SOFA位, 近門口有卡位, 空間感都闊, 坐得幾舒服.

Set Dinner有4款餐湯, 4款前菜, 9款主菜及飲品, 我們一行四人又第一次黎, 就點齊了4款餐湯及4款前菜!

餐湯包括有<蟹肉南爪忌廉湯> <黑松露忌廉湯> <西蘭花忌廉湯> 及 <蕃茄什菜湯>

<蟹肉南爪忌廉湯> 有絲絲蟹肉, 南爪味好香, 奶油味不會過濃而令你飲完都飽左.

<黑松露忌廉湯> 上有黑松露醬做點綴, 其實係蘑菇忌廉湯, 岩曬一向大愛蘑菇忌廉湯的我!

<西蘭花忌廉湯> 不會有過濃的青澀味, 十分清香.

<蕃茄什菜湯> 十分一般, 十分淡口味.

奉上餐湯時, 前菜都一起來了.

前菜包括有<凱撤沙律> <田園雜菜沙律配陳年醋汁> <大蝦占米多> <香煎法國鵝肝配焦糖酒醋藍莓>

沙律的蔬菜都幾新鮮, 凱撤沙律的醬汁較為多一點,陳年醋汁都酸度十足, 食完會好開胃.

<大蝦占米多> 有點似蝦多士, 先拆起蝦肉, 再加入其他配料炒完, 再鑲番入蝦

殼去焗的, 充滿濃濃的蝦膏味, 表面有點香脆, 好特別!

<香煎法國鵝肝配焦糖酒醋藍莓> 係小小一片鵝肝, 即時封煎, 我覺得有一丁點overcook, 裡面乾左少少, 不過表面十分香脆, 旁邊的藍莓好甜呀, 中和番油膩感.

共點了4款主菜包括有:

<燒紐西蘭羊架> $217

一碟4件紐西蘭羊架, 配3種醬汁, 焗薯及西蘭花.

羊架有一點點肥膏, 有一點點根, 燒至7成熟, 岩岩好, 肉質都幾淋, 圍邊有少少根好有O趙頭, 要一提個伴碟既焗薯及西蘭花都好好味! 係原個焗薯開邊而且焗得好香!

<果仁焗三文魚扒> $168

三文魚扒上灑上了果仁碎, 切開三文魚, 原來是半生熟的. 外面煎香, 裡面嫩滑. 原來是先煎後焗的, 一啖一口三文魚再加上香口的果仁碎, 原想帶出意想原到的美味! 好驚喜!!

<黑松露麵包蟹意大利飯> $208

先將麵包蟹起肉, 用番原個麵包蟹蓋裝住意大利飯, 再奉上一大匙的黑松露.

<德國式燒咸豬手> $208

超大碟, 還配上美式炸薯條, 仿佛回到了”哈迪斯”時代!

咸豬手個皮極度香脆, 脆得連坐我對面的朋友都聽到! 皮還連有下面一層脂肪, 已經焗得沒有油膩感, 只有骨膠原的口感, 肉質不算太咸, 仲係好淋添!

大家都爭住食佢塊皮, 真係超好食, 炸薯條都俾我地一掃之空! 果然係阿麥廚房的皇牌!

餐後我們回了凍朱古力, 頂層有CREAM, 配了細細的冰粒, 有點似淡口味的朱古力沙冰, 唔係好甜.

我們仲點埋餐廳唯一的甜品 - 焦糖芭菲 $48

我們還以為係一杯杯的雪糕, 原來係2件切餅雪糕, 入口濃郁的奶油味, 質感似雪糕, 外面淋上焦糖醬, 又有焦糖粒粒及果仁, 每啖都有焦糖粒粒咬下, 3種口感, 又係勁好味!!

真係攬住個肚走呀!

免責聲明:

產品由 阿麥廚房 提供, 本文章所發表的全部內容均屬個人意見，並不代表該品牌之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛，本人概不負責。

Carrie's Blogspot: http://littlecarriechan.blogspot.com/

Carrie’s Facebook Fans Page: https://www.facebook.com/carrieweblog

阿麥廚房

香港銅鑼灣加路連山道9號

Tel: 2808 0351．Fax: 3005 6313

http://www.openrice.com/zh/hongkong/restaurant/%E9%8A%85%E9%91%BC%E7%81%A3-%E9%98%BF%E9%BA%A5%E5%BB%9A%E6%88%BF/21180?s=3